TURA: Phulbari-oni Rajabala-ona dakanggipa National Highway (NH-127B) rama, jekon skango AMPT rama ine mingachim, ia ramani obosta namjabatroroengahani gimin ADIL Phulbari Western Zone (PWZ), suk ong·gijaniko parakatenba, ia ramako somoi gita matchotate on·china ramako tarienggipa contractor-rang aro Meghalaya sorkariko didiataha.
ADIL-PWZ-ni u·iatani gitade, Phulbari-oni Rajabala-ona dakanggipa ramako da·o tariengoba, ia ramako ta·rake tarijaengani gimin ia rama gita dingtang dingtang bosturangko salruragipa truck garirang re·ruraengani a·sel ia ramarang ta·raken nosto ong·piltaiengachim.
“Ia rama gita ma·manti bosturangko salgipa truck garirang, dongimin niamna bate metric ton 70 ba 80-mang ong·pile bosturangko salruraengani a·sel ramarang, iandakgipa garirangni jreaniko amchakjaenga. Bosturangko nangana bate gatenba salruraengani a·sel ramarang ta·raken nosto ong·pilengaha aro ramako taria changantian, adita sal somoirangni gisepon a·kolrara dakako nikpiltaina man·enga. Ramarang ta·raken nosto ong·pilengani a·sel salanti kam nangana re·ruraenggipa manderang aro jolo songdongenggipa manderangsa neng·nikanirangko chagrongna nangtokenga,” ine ADIL-PWZ-ni dilgiparang parakataha.
Indake ong·engon, ramarang nosto ong·na man·jana gita, ia ramarangko ta·raken tarichina aro somoi ra·chae donggija, ta·raken matchotatchina gita ADIL-PWZ, ramako tarienggipa contractor-rang aro sorkari official-rangko didiataha.
