TURA: Game ge·e cha·giparangna, an·tangtangni game ge·e man·gipa bosturangko chel·chakani, jo·ong aro sabisirangko name nirokani aro gama ge·anirango gital kolrangko jakkalani bidingo u·iatna aro talate on·na gita June 1 tarikoni 30 tarikona Agriculture & Farmers Welfare Ministry-ni ong·atenggipa ‘Khet Bachao Abhiyan’ campaign-ni bak gita Sombar salo, West Garo Hills a·jani ICAR-KVK, dingtangmancha Awareness program-ko Shalibhui songo ong·atangaha.
Ia awareness program-ko ong·atanio, songo noko game ge·e cha·giparang bang·en bak ra·angtokaha aro songni dilgipa Dhan Kumar Hajong-ba bak ra·angaha.
Ia awareness program-ko ong·atanio, West Garo Hills ICAR-KVK-ni SMS (Plant Pathology) Dr Joyoshree Mahanta aro SMS (Vegetable Science) Ramawatar Yadav, game ge·e cha·giparangna agan-talate on·anirangko dakangaha.
Gama ge·anio gital kol ba ostrorangko jakkalchina didina gita ia program-ko ong·atanio, me·su bitchilrangkoba, game ge·e cha·giparangna suale on·angjolaha.
