WILLIAMNAGAR: National Highway (NH-62) rama gita koelarangko niam gri salruraenga ine Nengkhra-ni Garo Students’ Union (GSU), Garoland State Movement Committee (GSMC) aro A·chik Holistic Awakening Movement (AHAM) dolrang, East Garo Hills a·jani Deputy Commissioner-na badi ka·doataha.
Deputy Commissioner-na badi ka·e sedoatgipa chittio ia dolgittam NGO-rangni parakatani gitade, koela salgipa truck garirang, Nongalbibra-oni Nengkhra gita re·baenba, ja·mano Dainadubi gita Assam-ona salangenga.
“Koelarangko ching jolrang gita, mongsongbate walni somoirango salruraenga. Koela salgipa truck garirang, nangchongmotgipa lekkarang grisa Nongalbibra-oni Nengkhra gita re·angenga aro Dainadubi gita Assam-ona koelarangko salangenga,” ine dolgittam NGO-rang, Deputy Commissioner-na badi ka·e sedoatgipa chittio parakataha.
Ia koela salgipa truck garirang, Motor Vehicle Act 1988-ni ning·o dongimin ton 12-na bate koelarangko salenga aro ia niamrangko pe·enga ineba NGO-rang matnangataha.
“Mining department-de koelarangko salna MT 12-nasan challan-rangko on·enga indiba ia truck garirang, ton 12-na baten koelarangko salenga. Unbaksa ia truck garirang, koela salani nangchongmotgipa lekkarangba dongja. Ia truck garirangni niam gri koelarangko salruraengani a·sel ian manderangna kenchakna nanganiko ong·atenga aro ramarangkoba namen nosto ka·enga. Ia koelarangko salruraanio jak donggipa manderang, sorkari aro police-rangoni jokna gitasa walni somoirango salengakon. Ian samtangtango ong·telaigiparangna nangchakeaniko aro sorkarinaba noksan ong·ataniko ra·baenga,” ine Nengkhra-ni dolgittam NGO-rang, Deputy Commissioner-na badi ka·doatgipa chittio parakataha.
Niam gita koela salruraenggipa garirangkode uamang champengenga ba jegalenga ong·ja ineba NGO-rang parakataha.
“Niam gri koela salruraanio jak donggipa manderang, niamrangko pe·engani gimin chinga iani bidingo ta·raken sandirokchina aro dos donggipa manderangni kosako rakgipa ja·kurangko de·china mol·molenga. Ia rama gita niam gri koela aro ma·manti bostu salruraenggipa garirangko bilakbate nirokna gita walni somoirango police patrolling-rangko bariatchina aro re·ruraenggipa garirangko nirokjringchina gitaba chinga didienga,” ine Nengkhra-ni dolgittam NGO-rang parakataha.
