M’laya a·dokna kr 40,000-ni ramarangko Union Minister parakata Salgnina ong·atenggipa NEIINFRA Summit-ko do·ga oe on·anga

SHILLONG: Meghalaya a·doko re·a doani cholrangko dingtangatna gita Sombar salo, Union Road Transport & Highways Minister Nitin Gadkari, gong kror 40,000-mangna ong·na sipilgipa rama tariani project-rangko parakataha.
Union Minister Nitin Gadkari Sombar salo, North East India Infrastructure Summit-o bak ra·na gita Shillong-ona re·baaha aro ia summit ba tom·bimonganiko a·bachengate on·angengmiting somoio jinmana aganprakangengon, Meghalaya a·dok gimikon kilometre 450 ong·gipa ramarangko tarina gong kror 39,800-mang ong·gipa National Highway project-rangko ra·bana sienga ine parakataha.
Gadkari-ni aganani gitade, gong kror 23,000 ong·gipa Greenfield Shillong-Silchar Corridor 4-Lane ramako km 165-mang ong·e tarigen aro ian salgro salaram jolo mongsongbatgipa project-rangoni mingsa ong·gen. Ia ramako tarimanahaon, Shillong-oni Silchar-ona songreani somoiko 50 percent-ni gita komiatgen aro Silchar gita Tripura, Mizoram aro Manipur a·dokrangonaba songre songgabatna man·gnok.
Gong kror 8500 korosna hisapgipa aro km 66-mang ong·gipa 4-Lane Greenfield Jorabat-Barapani Corridor-ni gimin janapatskaengon, ia ramako tarimanahaode, Guwahati-oni Shillong-ona ta·rakbate songrena man·gnok ine Union Minister parakataha.
Gong kror 4000-ni hisapenggipa aro km 136-mang ong·gipa NH-217-ni Darugre-Baghmara-Dalu ramani gimin janapatskaengon, ia project ba kamrangko matchotahaode, ian Garo Hills-o aro Bangladesh a·song baksa nangchapgipa simarango re·a doani cholrangko nambatatgnok aro ian songni nokni manderangna bading chiwalani, an·seng baljokani, lekka pora aro kamrangko ka·e cha·anio altubatatgnok ine Union Minister parakataha.
Shillong-Dawki ramani Pomlum-Umtynagar section, Tura-Dalu ramako taridapani, Tura Bypass project, Pynursla Bypass project aro Dhubri-Phulbari dolong-o nangchakegipa NH-127B project-rangni giminba ia tom·anio Union Minister janapangaha aro ia rama jal·angrangan Meghalaya a·doko re·a doani cholrangko mangrakbatatgnok ine aganangaha.
Meghalaya a·dokmangmangon kror 50,000-mang ong·gipa NH project-rangko Road Transport & Highways Ministry, jako ra·e ka·enga aro km 820 ramarangkode matchotmanaha ine janapatengon, km 310 ramarangkode da·o tariengkua aro mikkangchi km 440 ramarangkoba jako ra·e tariangkugen ine Union Minister Gadkari parakataha.
“Salgro salaram jolni rama jal·langrangkoba chinga India a·songni dal·dalgipa a·dokrango gitan namdapatna kang·kare ka·enga. Ian chingni miksongani ong·a aro iako chinga chu·sokatgen,” ine Gadkari, ku·rachakaniko on·angaha.
Ia ramarangko tariani project-rangara, Dawki aro Dalu-o border trade ba simao bading chiwalgrikaniko tang·doatan baksana Sohra, Mawlynnong aro Krang Suri Falls gita dakgipa biaprango tourism-ko tang·doatna dakchakgen ineba ua aganaha.
Ia summit-ko a·bachengatanio, Nagaland a·dokni Chief Minister Neiphiu Rio-ba dongpae jinmana aganprakangengon, ma·mong sorkarini Act East Policy-chi Meghalaya aro salgro salaramni gipin a·dokrango namroro silroroaniko nikna man·engaha ine janapangaha.