Niam gri chalaienggipa koela a·kolrangko chipattokchina Katakey Committee agana

SHILLONG: Meghalaya a·doko niam gri chalaienggipa pilak koela a·kolrangkon somoi gita chipna dingtangmancha niamko ra·gatchina Justice (retd) BP Katakey-ni single member committee, a·dok sorkarina ku·pattianiko on·angaha.
Niam gri chalaienggipa koela a·kolrangko chipna niamrangko ra·gatkujaskal, mande ba matburingrangni ga·akone sianiko chel·chakna gita bangbang donenggipa pilak koela a·kolrangkon kapengchina gitaba committee u·iataha.
Galchipgimin koela a·kolo mande saksani manggisiko man·ani bidingo Saipung police station-o mokordoma ka·gipa case-ni gimin janapatengon, ia ma·sina man·kugijagipa mandeko ta·raken sandichina aro sianggipa mandeni nokdangna tangka paisarangko gamchina gitaba Katakey Committee, raiko on·angaha.
Ia obostani bidingo East Jaintia Hills-ni Superintendent of Police (SP)-ni report-ko on·ani gitade, chi gapgipa galchipgimin koela a·damo me·asa saksani manggisiko nikaha ine Mulait Bri Sumer songni dilgipaoniko police-rang, re·anggipa May 9 tariko kobor man·soaha. Koborko man·soani ja·man Mooriap BOP-ni In-Charge, ua biapona re·ange nion, galchipgimin koela a·kolo, mande saksani manggisiko, chio tong·sa sripe dongako nikeaha. Ia manggisiara, kosakoni feet 50-mang ka·maosa ong·ani gimin ia manggisiko ra·ongkatna police-rang, SDRF-ni dakchakaniko ra·aha aro May-ni 10 tariko, manggisiko ra·ongkatna man·aha. Ia manggisiko post mortem ka·on, ia mande, chi sripe sia ine ma·sina man·aha.
Ia mandeni sianiara, niam gri koela bikotanio nangejanaba gnang indiba ia manggisiko da·onan ma·sikujaengani gimin aro ia mandeni sianiara antigni skangmangan ong·ahani gimin ia mandeara, ia jolrangoni ong·na nangja ine Katakey Committee parakataha.
Ia koela a·kolo manggisiko man·aniara, East Jaintia Hills-ko man·chape Meghalaya a·dokni dingtang dingtang koela a·damrangko, maming peng·ani gri donengani a·sel kenchakna nanganiko mesokani ong·taiaha ineba Committee parakataha.
Koela a·kolrango mande aro matburingrangni sianiko champengna gita niam gri chalaienggipa koela a·kolrangko chipna niamrang aro bangbang ong·e dongenggipa koela a·damrangko kapengna nangchongmotenga ineba Katakey Committee parakataha.