SHILLONG: Bangladesh a·songo a·songtangni manderangkon nokchaksona jechakrongengani a·sel India aro Bangladesh a·songni simarang gita India a·songona napsrukbaenggipa manderangko rim·e watatpilani somoirango, neng·nikanirangko chagrongna nangenga ine Bristibar salo, a·dokni Deputy Chief Minister aro Home Minister Prestone Tynsong parakataha.
Tynsong-ni parakatani gitade, India a·songona napsrukbagipa manderangko India-ni sipairang rim·e a·songtangona watatpilon, Bangladesh a·songo Border Guards Bangladesh (BGB)-ni sipairang, nokchaksorongjaengani gimin ua, Border Security Force (BSF) baksa tom·e iani bidingo chanchirimangaha.
Niam gri napsrukbaenggipa manderangko rim·anio sorkari official-rang, dingtang dingtang neng·nikanirangko chagrongna nangronga maina Foreigners Act-ni ning·o ongimin niamrangara namen bakroa ineba Tynsong talataniko on·angaha.
Gipin biaprangoni India a·songona niam gri napsrukbaanirangko nikon chel·chakgipa sipai dolrang, ia manderangko ta·raken a·songtangona watatpilronga indiba Bangladesh a·songni sipairang, a·songtangni manderangkon nokchaksona sikrongjani a·sel neng·nikanirangko chagrongna nangenga ineba ua aganaha.
Bangladesh a·songni sipairang, a·songtangni manderangko nokchakna jegalrongani a·selan dolgni sipairangni gisepo nanggrikanirangona sokenga ineba Home Minister aganaha.
Iandakgipa obostarangko chagrongna nangon, lekkarangko aro gipin record-rangoniko niesa namatna gita nangronga ineba ua aganaha.
Adita salrangna skangsan, Assam-ni South Salmara-Mankachar a·jao donggipa Indo-Bangla simao, Bangladesh a·songni sipairang nokchaksona jegalahani a·selan Bangladesh a·songni saksku manderang, ‘No-Man’s Land’ ba a·song damgnini bijangchio jachange dongna gita nangahachim.
Ia saksku manderangko, BSF-ni sipairang, India a·songchipakna niam gri re·napbaengmiting somoio rim·e, a·songtangona watpilatahachim indiba ia manderangko Bangladesh a·songni sipairang, Bangladesh-ni ong·ja ine jechakahani a·sel, ia manderang, a·song damgnini gisepo jachange dongna gita nangaha.
Iana skang, South West Garo Hills a·jani Nandirchar a·jao donggipa Indo-Bangla simaoba, India a·songona re·brangbaenggipa mande saksako BSF-ni sipairang rim·e, Bangladesh a·songona watatpilon, uko BGB-ni sipairang nokchaksona jechakahani a·sel dolgnini gisepo adita nanggrikna gita a·bachengahachim. Indiba ja·mano ia mandeko, uni ma·drangrangan re·bae, Bangladesh a·songona rimangpilaha.
B’desh-o nokchakjaengani a·sel niam gri napsrukgiparangko watatpilanio neng·nikaniko man·enga: Home Minister
Date:
Share post:
