NE-o dal·batsranggipa Organic Spice Processing Unit-ko Finance Minister kulie on·a

SHILLONG: India a·songni North East (NE) ba salgro salaram jolo dal·batsranggipa Organic Spice Processing Unit-ko Sukrobar salo, Union Finance Minister Nirmala Sitharaman, Ri Bhoi a·jani Bhoirymbong-o kulie on·angaha aro ia karkanako kulie on·anganio Meghalaya a·dokni Chief Minister Conrad K Sangma aro Sikkim a·dokni Chief Minister PS Tamang Golay-ba dongpaaha.
Ia Organic Spice Processing Unit-ko India sorkarini Mission Organic Value Chain Development for North Eastern Region (MOVCD-NER)-ni ning·o ra·doatako man·gipa Eastern Ri Bhoi Organic Farmer Producer Company (FPC) kuliaha.
Ia Organic Spice Processing Unit-ko oprake on·anganio Union Finance Minister Nirmala Sitharaman, jinmana aganprakangengon, ian salgro salaram jolo certify ka·ako man·chenggipa spice processing unit ba karkana ong·enga aro ian salgro salaram jolo organic agriculture sector-na mongsonggipa karkana ong·gen ine ka·dongsoenga ine aganaha. Ia karkanao, e·ching, holdi, gul muris aro jal·likko man·chape ong·telaigipa dingtang dingtang mosilarangko bilsiprakon metric ton 10,000-na bate tarina man·gen ineba Union Minister aganaha.
Ia karkanako kuliahani gimin Eastern Ri Bhoi Organic FPC-ko mittelpilangengon, ia karkanana National Programme for Organic Production (NPOP) aro EU Organic Standards-ni ning·o certify ka·ahani gimin ian India a·songosan ong·aigija gipin a·songrangonaba bosturangko palna sim·na man·gen ine Sitharaman aganaha.
Ia Processing Unit-ko kulianichi, Meghalaya aro salgro salaram a·dokrango game ge·e cha·enggipa sak 5,500-mangni gita manderang, an·tangtangni game ge·e man·enggipa bosturangko gital kolrangchi donna man·e aro bosturangko taridapna cholrangko man·e, noksan ong·aoniko komiatgnok aro bang·en namgnirangko man·gnok ineba Union Minister aganaha.
Una agreba, ian India a·songni aro gipin a·songrangoni bregiparang baksa bading chiwalgrikna cholko man·e, game ge·e cha·enggipa manderang, jangchio donge breskaenggipa dol ba manderango pangchakna nangjawaha ineba ua aganaha. Ia karkanao jolni manderangnaba kamrangko ka·e cha·na chol ong·gen ineba Sitharaman aganaha.