SHILLONG: Party-ni MDC-rang ong·katgrimenga ine kobor on·aniko Robibar salo Voice of the People’s Party (VPP) jegalatenba, 2025 bilsini Khasi Hills Autonomous District Council (KHADC) election-o chegopenba, Executive Committee-ko chalaia intalan iandakgipa jangbingbanganirangko knasona man·enga ine a·kangataha.
2025 bilsini KHADC election-o VPP, gimik dam 29 seat-rangoni dam 17 seat-rangko cheenba, Executive Committee-ko rikna man·ahachim.
Indake ong·engon, party-ni MDC sakbri ong·katgrimna miksongenga ine jangbingbanganiara maming gital katta ong·ja aro KHADC-o EC-ko chalaienggipa party-ni ning·o jajaataniko ra·bana miksonganisan ong·aia ine VPP-ni president Ardent Miller Basaiawmoit parakataha.
“MDC sakbrini party-ko watna miksonggipani bidingo jangbingbangani ian skanggipa chang ong·ja maina chingni KHADC-o Executive Committee-ko rikchengaonin iandake jangbingbanganirangko knasona man·enga,” ine Basaiawmoit aganaha.
VPP president-ni parakatani gitade, iandake jangbingbanganiara VPP MDC-rangni gisiko jajaataniko ra·bana badiaba political party-rangni jotton ka·anisa ong·enga.
“Ian kakket ong·gipa kobor ong·ja,” ine Basaiawmoit aganaha.
Mawkyrwat-ni VPP MDC Pynkhrawboklin Kharjahrin-ni Executive Committee-o member ong·aniko watani ja·man gipin MDC-rangba party-oni ong·katgrimna miksongenga ine jangbingbanganirangko knasona man·ahani gimin VPP-ni president, iani bidingo talataniko on·angaha.
Mawkyrwat-ni MDC, jean KHADC-o Council Assets Department-ni Executive Membor ong·engachim, an·tangni constituency-o daitorang bang·enga ine pa·sikenba, June-ni 20 tariko, kamtangko watna chittiko on·ahachim. Uni kam watani salara, KHADC-o ong·atanggipa summer session-ni bon·kamgipa salba ong·ahani gimin bang·bata manderang aro dolrangan, VPP-ni gisepo meligrikna man·jaenga ine chanchichipanirang ong·kataha.
