W’nagar-o me·chik bi·sako so·otani bidingo gital dake inquiry dakchina GSU dabia

WILLIAMNAGAR: East Garo Hills a·jani Williamnagar-o donggipa Samgong jolo, me·chik bi·sa saksako ka·saninggija dake so·otaniko sandirokanio kamrang ka·sinengani a·sel, dos dakgipa mandeko da·onan rim·na man·kujaenga ine Garo Students Union (GSU) Eastern Zone, suk ong·gijaniko parakatenba, ia me·chik bi·sako so·otani bidingo gital dake inquiry-ko dakchina ba sandirokchina dabie, a·dokni Chief Minister Conrad K Sangma-na sedoataha.GSU Eastern Zone-ni parakatani gitade, ia a·selni bidingo sandirokaniko dakani da·o bilsisa ong·na am·pilengahaoba, dos dakgipa mandeko rim·na man·kujaenga aro iani bidingo magisterial ba departmental inquiry-ko matchotahaoba, inquiry dakanio maiko man·aha, da·alonan parakchipkujaengachim.“Samgong jolo me·chik bi·sako so·otani bidingo inquiry dakani da·o bilsisa ong·na am·pilengaha indiba da·alonan dos dakgipa mandeko rim·kujaenga. Iani bidingo magisterial aro departmental inquiry-ko dakahaoba maiko sandie man·aha aro mai ja·kurangko de·enga da·alona kingkingan maming kamrangko nikna man·kujaenga,” ine GSU Eastern Zone-ni president Goera R Sangma, Chief Minister-na sedoatgipa chittio parakataha.
So·ota man·gipa me·chik bi·sani nokdangnaba da·alona kingkingan compensation ba dakchakanirangko on·ani bidingo maming kobor dongkujaenga ine janapatskaengon, ia me·chik bi·sako so·otanio jak donggipa mandeko da·alona kingkingan rim·na man·kugijaniara, bichal ka·ani bewalo bilgrianiko mesokani ong·enga aro indake ong·genchimode manderang, aino ka·dongchakna man·jawaha ine GSU Eastern Zone-ni president parakataha.
“Uni gimin ia me·chik bi·sako so·otani bidingo Special Investigation Team (SIT)-chi sandirokenba, dos dakgipa mandeko ta·raken rim·china chinga a·dokni Chief Minister aro gipin nangchakegipa department-rangko mol·molenga. Ia a·selni bidingo magisterial ba departmental inquiry-ko dakanio mai ja·kurangko de·aha, uarangko jinmana parakchina gitaba chinga dabienga,” ine GSU Eastern Zone-ni president parakatenba, iani bidingo maming ja·kurangko de·jagenchimode mikkangchi uamang rakgipa ja·kurangko de·e dabiangskaani cholrang donga ine mikrakataniko on·angaha.