TURA: Meghalaya a·doko Electoral roll-rangko nipilna Special Intensive Revision (SIR)-ko dakani bak gita re·anggipa June 30 tarik dipet Booth Level Officer (BLO)-rang, nokprakprakona re·e, enumeration form-rangko sualna a·bachengatahaon, Bristibar salo, West Garo Hills a·jani District Election Office, SIR-ni bidingo talate on·na gita dingtang dingtang political party-rang baksa tom·aniko, Tura-ni DRDA Conference Hall-o ong·atangaha.
Ia tom·aniko, West Garo Hills a·jani Deputy Commissioner aro District Election Officer (DEO) Vibhor Aggarwal dilangaha aro tom·anio, Electoral Roll Observer Rikse R Marak, ERO-rang aro AERO-rangba dongpae bak ra·angaha.
Ia tom·aniko ong·atani bidingo political party-rangna talate on·angengon, SIR-ni kamrangna political party-rangni Booth Level Agent (BLA)-rangkoba ra·ahani gimin SIR-ko ka·anio dakna nanggni aro nanggijanirangko talate on·na ia tom·aniko ong·ataha ine Deputy Commissioner aganaha.
Electoral roll-rangko SIR ka·anio, bakrimaniko on·china gitaba ua political party-rangko aro a·jao songdongenggipa pilak manderangkon didiangaha.
Ia tom·anio, Electoral Roll Observer Rikse R Marak-ba aganprakengon, SIR-ko dakanio, ERO aro AERO-rangna tikatgimin kamrangko name chu·sokatna nangengani gimin aganangskaaha.
Iana skang, West Garo Hills a·jani Additional Deputy Commissioner (ADC) Election I/c Nipon Hajong-ba aganprakangengon, ia Special Intensive Revision-na District Election Department-ni ka·sogipa kamrangni bidingo agan-talatanirangko on·angskaaha.
Booth Level Agent (BLA)-rangni daitorangkoba Hajong, dingtang dingtang political party-ni dilgiparangna agan-talate on·angaha.
