TURA: East aro North Garo Hills a·jako nangdimeatgipa ramarangoni mongsonggipa Songsak-Nangapa-Mendipathar ramako blacktopping on·e tariani kamrang chu·gimik matchotsrangkujaskal, ia rama gita dal·dalgipa truck garirangni re·ruraaniko champengatchina Garo Hills Youth Solidarity (GHYS), a·dok sorkariko didiataha.
Iani bidingo East Garo Hills a·jani Deputy Commissioner-na sedoatengon, Songsak-oni Nangapa gita Mendipathar-ona dakanggipa ramani obosta namsrangjaha indiba ia rama gita dal·dalgipa truck garirang, mongsongbate koela salgipa, ro·ong salgipa, bol salgipa, FCI-ni truck garirang aro uandakgipa gipin dal·dalgipa garirang re·rurakuengani a·sel, ia ramao songdongenggipa manderangna namen kenchakna nanganiko ong·atenga ine GHYS parakataha.
GHYS-ni parakatani gitade, Songsak-oni Mendipathar-ona dakanggipa rama gita sagipa manderangko salrurana, skul college re·enggipa chatro chatrirangna aro dingtang dingtang kamrangna re·ruraenggipa manderangna namen nangchongmotgipa rama ong·a indiba ia rama gita salantian dal·dalgipa truck garirang re·ruraengani a·sel da·o ramani obostako namjabatataha aro iani a·sel ramako re·ruraenggipa manderang aro jolo songdongenggipa manderangba neng·nikanirangko chagrongna nangtokenga.
“Ia ramani obosta namsrangjahani a·sel ian jolo songdongenggipa manderangna aro salanti nanga kamrangna re·ruraenggipa manderangna kenchakna nangani ong·enga. Ia rama gita dal·dalgipa garirangko, mongsongbate koela, ro·ong aro uandakgipa bosturangko salruragipa garirangko re·na on·kuaia ong·ode mikkangchi ia ramani obosta namjabataona soknaba dongaha. Uni gimin manderangna naljokaniko on·na aro rama gita re·ruraenggipa manderangni namgnina, ia ramako chu·gimik black topping on·e taripilkujaskal, ia rama gita dal·dalgipa truck garirangni re·ruraaniko champengatchina chinga mol·molenga,” ine GHYS-ni president Endick Marak parakataha.
