Cha·ugimin adita bike-rangko man·a
TURA: Garo Hills-o gari gora cha·uanirang batroroengani gimin cha·ugiparangko rim·na police-rang rakbee kamrangko ka·engon, Dadenggre jolrango bike cha·ugipa mande sakgittamko rim·na man·aha.
Police-rangni u·iatani gitade, re·anggipa July-ni 11 tarik walo, Tikrikilla Police Station-ni sipairang, re·ruraenggipa garirangko nirikkiengmiting somoio, registration number plate grigipa Bajaj Platina motorcycle-o mande sakgniko Tikrikilla Bazar-oniko rim·na man·aha.
Rim·a man·gipa mande sakgniara, West Garo Hills a·jani Damal A·sim jolo donggipa Teksagre songni Minith Marak aro Raksamgre-oni Jaksram G Momin ong·a. Ia mande sakgniko rim·ani ja·man, nambate sing·sandina Tikrikilla Police Station-ona rimangaha aro uamangko sing·sandion, ia manderangoniko AS-21M 7462 Bajaj Pulsar motorcycle-koba man·aha.
Ia Bajaj Pulsar motorcycle-ni gimin sing·sandion, ia motorcycle-ko uamang, Dadenggre joloniko cha·uaha ine ku·rachakaha.
Iani bidingo, Dadenggre police station-o mokordomako segatenba, nambate sing·sandiangkuna aro ain gita ja·kurangko de·na Dadenggre Police Station-na pakwate on·aha. Iani bidingo Dadenggre Police Station-ni police dol, ning·tubate sandirokangkuon, bike cha·uanio jak donganina matnangako man·gipa sakgipin mande, Tebronggre songoni Baiti A Sangma-koba rim·na man·aha.
Uandaken police-rang, Mongolbar salni bako, Damal Asim Police Station-ni ning·o donggipa Rongmasugre songoniko, cha·ugimin bike bolsako man·taiaha.
