MANGSANG: East Garo Hills a·jani Mangsang jolo donggipa Rengkil chiringko kabatgipa dolong dongkujani a·sel, Mangsang jolo donggipa song dambonga, chong·motan Nongbak Rengkil, Gindil, Nongbak Ading, Badilpa aro Chibra songni manderang, da·o gita wachini somoirangode re·a doanirango neng·nikanirangko chagrongna nangtokenga ine kobor on·aha.
Kobor on·timgiparangni u·iatani gitade, ia song dambongaoni damgittam, chong·motan Nongbak Rengkil, Gindil aro Nongbak Ading songrangde East Garo Hills a·jao ga·aka aro Badilpa baksana Chibra songrangde North Garo Hills a·jao ga·akskaa.
Ia song dambongaona rama dongpagipaba kutchasa ong·a aro uandaken wachini somoiode 4 wheel donggipa garirangba re·ruraanio neng·nikanirangko man·na nanga ine kobor on·timgiparang u·iataha.
Ia jolo Rengkil chiringko kabatgipa RCC dolong chongipade damsa donga indiba ia dolongara, gipin biaponasa dakangskaani gimin manderang, re·a doanio neng·nikanirangko man·enga.
Kobor on·timgiparangni u·iatani gitade, ia jolo manderangni jelbra jelsuani sak 1200-na bata indiba ia songrango sorkari LP skul damgnisan dongaia aro middle ba high skulrangde dongja.
“Ia jolrango songdongenggipa manderang bang·batan gama ge·ani aro bagan barirangko dake cha·giparangsa ong·a indiba chiringko kabatgipa dolong dongjani a·sel game ge·e cha·giparang, da·o gita wachini somoirangode chi dal·ani gimin an·tangtangni game ge·e man·paenggipa bosturangko gipin biaprangona ra·ange palna sim·na man·ja,” ine songni mande saksa, kobor ra·timgiparangna parakataha.
Dolong dongjani a·selan skulrango poraienggipa bi·sarangba da·o gita wachini somoirangode namen neng·nikanirangko chagrongna nanga aro chirang dal·ahaode porikkarangko sena chol man·parongja ineba kobor on·timgiparang parakataha.
Dolong dongjani a·selan da·o gita chi dal·ani somoirango chirangko batna nange, manderangni janggirangna kenchakna nangani ong·enga ineba songni manderang u·iataha.
“Songni bi·sarang, skulrangchi re·angpaoba, chiringonan kilometer 5 batpile ja·achi re·na nangenga aro uni ja·man chiko bate re·angkuna nangenga. Songni ramaba 4 wheel donggipa garirangnan re·na namjani gimin sagipa ding·gipa manderangko hospital-rangona ra·na nangani somoirangoba neng·nikanirangko chagrongna nangenga,” ine songni manderang parakataha.
GSU Mangsang unit-ni u·iatani gitade, ia songrango chagrongna nangenggipa neng·nikanirangko uamangna u·iatani ja·man, uamang maiba cholrangkode sandina jottoan ka·engachim indiba da·alonan maming dakchakanirangko on·na man·kujaenga.
“Chinga iani bidingo Rongjeng-ni MLA Jim Sangma aro local MDC-koba gronge agangrikahachim indiba da·alonan maming dakchakanirangko man·kujaenga. Iani bidingo chinga a·dokni Chief Minister-naba u·iatahachim indiba da·o dipet maming dakchakaniko man·kujaenga. Ia songo dolong rikna gita jolo songdongenggipa manderangoniba project report-ko tariahachim indiba maming namgnikon man·kujaenga,” ine GSU Mangsang unit-ni president Barnawell Sangma, suk ong·gijaniko parakataha.
