SHILLONG: Re·baenggipa 2028 bilsini Assembly election-na skang Meghalaya a·doko Congress dolko bilakatpiltaina gitade, Meghalaya Pradesh Congress Committee (MPCC)-ni gital president-ko seokna election-ko ong·atkujaskal, interim president-ko seokna nangenga ine Trinamool Congress (TMC) Meghalaya-ni state president aro Congress dolni gitcham dilgipa Charles Pyngrope, All India Congress Committee (AICC)-na ku·pattianiko on·angaha.
Iani bidingo kobor ra·timgipa manderang baksa agangrikengon, Meghalaya a·doko Congress dol, rakbatsranggipa somoiko chagrongna nangenga maina da·o dipet Congress dolo skanggipa changna Meghalaya Legislative Assembly-ni member saksaba dongja ine Pyngrope parakataha.
A·doko Congress dolko ta·raken dingtangatna nangnikenga ong·ode, da·o 2028 bilsini Assembly election-na skangan, interim president-ko songe, party-ko tangatpilna nangenga ineba ua aganaha.
Party-ni election-ko ong·atkujaskal party-ni president-ko dikdiksana seokchengna man·aigen ineba ua aganaha.
“Da·o election-ko ong·atgija Congress dol, ta·raken dingtanganiko nangnikenga ong·ode, party-ni election-ko ong·atkujaskal, interim president-ko songchengna man·gen,” ine Pyngrope aganaha.
Ua an·tangba Congress dolona re·bapilna miksonganirang dongama ine sing·aninade ua mamingkoba aganna gita jechakskaaha.
Pyngrope-ni parakatani gitade, chengonin Congress dol, party-ni state president aro treasurer-ko election ong·atesa seokrongachim indiba batanggimin bilsirango Congress dol, election-ko ong·atgijasa dilgiparangko seokengaha.
“Anga an·tangba Congress-o ong·mitingo dingtang dingtang gadangni kamrangko jako ra·aha. Skangode MPCC-ni president aro treasurer-ko election ong·atesa seokachim indiba da·ororo ia kamko Congress party ja·rikjaengaha,” ine ua aganaha.
Pyngrope-ni aganani gitade, MPCC-o state president aro treasurer-ko seokgipa sak 82-mangni gita electoral college donga aro ukoba election ong·atesa skango MPCC-ni treasurer-na seokaha.
Congress-ni niam bidiko party-ni je member-ba MPCC-ni president-na susana man·aia ine janapatengon, party-o donggipa member-rangni nangnikani gitasa party-ni president-ko seoka ine TMC-ni state president aganaha.
Congress dolni gitcham dilgipa DD Lapang, 2017 bilsini December 30 tarikona kingking MPCC-ni president ong·e kamko ka·aha aro uni ja·man, 2018 bilsini Assembly election-na skangsa Celestine Lyngdoh, uni kamko jako ra·rikskaaha ineba Pyngrope aganaha.
Party-ni dilgiparangkode, dilgiparangni nangnika gita songaigija, election-rangko ong·ate ba party-ni member-rang jinmani namnikani gitasa seokna nanga ineba ua aganaha.
M’laya-o Cong-ko tangatpilna gital interim prez-ko seokna nanga ine TMC ku·pattie on·a
Date:
Share post:
