SHILLONG: Meghalaya Residents Safety & Security Act (MRSSA) 2016-de a·doko songdongenggipa Tribal manderangko chel·chakna chu·onggipa niam ong·ja ine Hynniewtrep Youth Council (HYC) a·kangataha.
2016 bilsini MRSSA-o gipin biaprangoni re·napbaenggipa manderangko biming segatna aro facilitation centre-ko entry/exit point dake jakkalna niamrang dongja ineba HYC a·kangataha.
“MRSSA 2016-o a·dokni Tribal manderangko chel·chakna gita niamrang chu·onga ine aganenga ong·ode, ia Act-ni badia section-o gipin biaprangoni Meghalaya a·dokona re·baenggipa manderang, an·tangtangko biming segatna nanga ba gipin biaprangoni re·baenggipa manderangko biming segatna gita facilitation centre-rangko entry/exit point dake jakkalna bilko on·a, chingna mesokchina,” ine HYC-ni president Roy Kupar Synrem aganaha.
MRSSA 2016-o a·dokni Tribal-rangko chel·chakna gita niamrang chu·onga ine agananichi sorkari, a·dokni manderangko dilsretna jotton ka·enga ineba ua matnangataha.
Ia Act-o gipin biaprangoni re·baenggipa manderangko biming segatna gita maming niamrang dongja ine janapatengon, an·tangtangni gimin talataniko on·na jechakgipa manderangko badia section-ni ning·o sasti on·na bil donga ine Synrem sing·doataha.
“Meghalaya a·doko Inner Line Permit (ILP)-ko ra·gatna man·jaenga ong·ode a·dok sorkari, 2020 Amendment Bill-ko pass ka·skana nanggen,” ine HYC president aganaha.
A·dokni mongsonggipa project-rangko gipin biaprangoni company-rangnasa on·enga ine matnangatskaengon, a·dokni chadamberangde, iandakgipa company-rango, security guard gita dakgipa kamrangkosa ka·na nangenga ine Synrem aganaha.
“A·dokni chadamberang a·doktangon kamrangko man·jaengani gimin songtang noktangko wate gipin a·dokrangonasa re·ange kamrangko sandina nangenga,” ine Synrem aganenba, a·dokni chadamberangkode a·dok sorkari, security guard dakgipa kamrangkosa ka·ate, gipin biapni company-rangnasa man·e cha·na cholko on·skaengama ine sing·doataha.
