BOKO: Assam aro Meghalaya a·dokni sima jolo donggipa Umshiak picnic spot-ko Robibar salrango chipe donna gita songni manderang tik ka·angaha aro Robibar salrangode Umshiak songona re·angjachina songni manderang, gipin biaprangoni manderangko mol·molataha.
Gizang Valley Dorbar-ni president Gargish J Marak-ni u·iatani gitade, Umshiak jolo donggipa Gizang chibimani nitoani gimin ia sal somoirango bang·a manderangan, ia biapona rona aro biapko nina gita re·angtokenga indiba Robibar salrango, manderang bang·bate ia biapona rona aro picnic-rangko cha·na re·angtokengani a·sel songni manderangna, mongsongbate Kristianrangni olakkianirango golmal ka·anirangko man·skaenga.
Iani bidingo, Malapara, Moipara, Machpara, Niyagalam, Khasi Salbari, Umshek, Thunaguri, Rongthali, Madan Killor aro Rangseng songrango donggipa manderang tom·aniko ong·atangenba, Robibar salode, ia Umshiak picnic spot-ko tourist-rangna chipe donna gita tik ka·angaha ine Marak parakataha.
“Robibar salrango skul, college aro office-rang chutti ong·tokani gimin bang·a manderangan Robibar salo, ia Umshiak picnic spot-ona rona aro picnic-rangko cha·na re·batokenga indiba Robibar salo, ia jolrango donggipa Kristian Garo aro Khasi manderang, giljarangchi re·e olakkitokani gimin iandake manderangni jinma jinma re·bae, ia biaprango roanichi, gilja ka·anirango neng·nikanirangko man·ronga. Uni gimin Umshiak songko man·chape gimik dam 10 songni manderang, Robibar salode ia picnic cha·chakgipa biapko chipe donna tik ka·angaha aro Robibar salrangode ia biapona re·bapajachina chinga a·palni manderangko mol·molatenga,” ine Gizang Valley Dorbar-ni president parakataha.
