SHILLONG: Sombar pringwalo FIFA World Cup-ni final ba bon·kamgipa kal·susaaniko ong·atangani ja·man, State Secretariat-o Cabinet Minister-rang aro kam ka·giparangba komibate, office-ona sokbatokaha.
Ia Football World Cup-ko chatro chatrirang, maming neng·nikani gri nina man·na gita a·dok sorkari, skul aro college-rangkosa Sombar salo chutti watahachim indiba State Secretariat-o kam ka·giparangba, pangna gita ong·gija bang·gija manderangsan office-ona re·bae kam ka·aniko nikna man·aiaha.
Kobor on·timgiparangni u·iatani gitade, Sombar salo pilak sorkari office-rangkon kulie donahaoba, adita sak minister-rangsan Secretariat-ona kamtangtangko ka·na re·baaiaha aro kam ka·giparangoniba bang·batan office-ona sokbatokjaha.
A·dokni Chief Minister Conrad K Sangma, jean skul-college-rangko Sombar salo chutti watahachim, New Delhi-o a·dokni gital Rajya Sabha MP James K Sangma-ni ku·mikchetanio bak ra·eskaaha. Koborko man·soani gitade, a·dokni Deputy Chief Minister Prestone Tynsong-ba Sombar salo, New Delhi-on ong·achim.
Sombar salo, pangna ka·ronga gitan sorkarini kamrangko ka·genchimoba, Secretariat-o bang·bata kam ka·giparangan office-ona sokbagijaniko nikna man·aha.
