TURA: West Garo Hills a·jani Arenggre songo, matchotkugijagipa Jal Jeevan Mission (JJM) project-ko songni manderangna pakwate on·ani a·sel songni manderang chi man·tokkujaenga ine songni mande saksa, West Garo Hills a·jani Deputy Commissioner-na seachi badi ka·doangenba, ia project-ni bidingo sandiroke nanga gita ja·kurangko de·china didiataha.
Arenggre songni Chesrang Sangma minggipa mande saksani Deputy Commissioner-na seachi badi ka·doangani gitade, ia JJM project-ko matchotaha ine kamko ka·gipa contractor aro official-rang a·kangenba, songni manderangna pakwate on·angaha indiba da·onan ia JJM project-ni chi tingtotsakoba songni manderang man·kujaenga.
“JJM-ko ma·mong sorkari, nokantinan namgipa ringani chiko on·na miksongesa ra·gate on·aha indiba matchotkugijagipa ba kam ka·gijagipa water supply scheme-ko songna pakwate on·aniara, ma·mong sorkarini miksonganikon pe·ani gita ong·enga. Ia project-ko official-rang matchotaha ine a·kangengoba chirangko man·tokjaengani a·selan songni manderang neng·nikanirangko chagrongna nangenga,” ine Sangma, Deputy Commissioner-na badi ka·e seatgipa chittio parakataha.
Arenggre songni JJM project-ko ta·raken re·ange nichina aro technical audit ka·china didiatengon, iani bidingo kamko ka·gipa contractor aro official-rangni kosako nanga gita ja·kurangko de·enba, ia songna JJM-ni chirangko jokate on·na ge·etaniko on·china Sangma, Deputy Commissioner-ko didiataha.
