Lekka porani kamrangko namdapatna chatro chatrirang baksa agangrikchina PM-ko didia
TURA: NEET porikkao paper leak ong·aniko jegale, New Delhi songjinmani Jantar Mantar-o tom·tome jingjengatenggipa chatro chatrirangni kosako bil jakkale, doka satanina Tura Based Church Leaders’ Forum (TBCLF), sorkari aro police-ni kamko jegalatenba, chatro chatrirangni namgnina lekka porani kamrangko namdapatchina ma·mong sorkariko didiataha.
Ia bilsini NEET-UG porikkao paper leak ong·anina aro CBSE on-screen marking process-o niamrangko ja·rikjahani gimin suk ong·gijaniko parakatengon, “Porikka segipa candidate-rangoniko nanga gita exam fee-rangko ra·engani gimin National Testing Agency (NTA), porikkarangko somoi gita nama bewalo ong·atna nanga. NEET porikkao paper leak ong·ani aro CBSE on-screen marking process-o niamrangko ja·rikja ine matnanganiara, porikkarangko ra·anio aro nipiltaiani kamrango kakket ong·ani aro parak ong·ani gri gita ong·enga,” ine TBCLF parakataha.
A·songo porikkarangko ra·ani kamrango mikkimko rakkianiara India sorkarini daitoan ong·a ine janapatskaengon, “NEET porikkao paper leak ong·ani aro CBSE on-screen marking process-o niamrangko ja·rikja ine matnanganiko jakgitele aro ning·tue sandirokchina chinga mol·molenga. Paper leak ong·ani aro porikka seanirangko nipilanio ong·gija dakgipa manderangni kosako nanga gita ja·kurangko de·na nanga,” ine TBCLF didiangaha.
Adita salrangna skang, New Delhi songjinmani Jantar Mantar-o tom·tome jingjengatenggipa chatro chatrirangko, teargas godape gol·dikrangchi dokruruahani gimin suk ong·gijaniko parakatskaengon, “Jakgitelgipa a·songode tom·tome tom·chimongani aro jegalanirangko mande ra·na nanga. Chatro chatrirangni kosako bil jakkalanirangko ta·raken sandirokna nanga aro nanga gita ja·kurangko de·na nanga,” ine TBCLF didiataha.
Chatro chatrirangni namgnina lekka porani kamrangko namdapatna gita a·songni Prime Minister, jinmana agan-talatanirangko on·na nanga aro chatro chatrirangni nangnikanirangko chu·sokate on·na gita dolgni agangrikna nanga ineba TBCLF didiangaha.
A·songo ong·enggipa obostana Union Education Minister-koba dai ra·china aro lekka porani kamrangko namdapatna gita ja·kurangko de·china TBCLF didiataha.
