AMPATI: Ia sal somoirangara wachini somoi ong·engani gimin buringo man·gipa me·gimurangko skatang cha·jachina aro manderangni jakkalenggipa chirangko skatang moila ong·atjachina gitaba Meghalaya sorkarini Health & Family Welfare Department ning·o donggipa Food Safety Commissionerate, manderangko didiataha.
Wachini somoirango skatang buringni me·gimurangko cha·e bang·a manderangan saanirangko aro mitamrangde janggirangko gimaatna nangengani gimin wachini somoio buringni me·gimuko skatang cha·jachina sorkari didiataha. Una agreba, gama ge·anirango jakkalgipa samrangko skatang jakkalanichi aro skatang galramramanichi, manderangni jakkalenggipa chirang moila ong·atako man·engani gimin chirangko moila ka·jachina sorkari mikrakataha.
Food Safety Commissionerate-oni u·iatani gitade, ia sal somoirango ding·ani batroroengani gimin aro skatang mikkarangba waengani gimin buringrango chagipa me·gimurangkoba dingtangataha aro ian mandena kenchakna nanganiba ong·a.
Buringrango skatang charamramaigipa me·gimurangni pal, manderangni ge·gipa me·gimurangkosa ra·e cha·china Commissionerate didiataha. Buringo man·gipa me·gimurangara cha·na namama namja, namgipa aro ka·dongna man·gipa porikka ra·e niani cholrang dongja ineba Commissionerate-oni talataniko on·ataha.
Manderangni jakkalenggipa chiakol, chiring chibisik aro chi man·gipa biaprango, gama ge·ani aro jo·ong siatna jakkalgipa samrangko skatang jakkaljachina aro galramramjachina gitaba Food Safety Commissionerate mikrakataniko on·angaha.
Bisi donggipa me·gimurangko cha·mangenchimode ba sam donggipa chirangko ringmangenchimode, ta·raken sepangbatgipa health centre-rangona re·ange sanna bananirangko ra·china gitaba sorkari official-rang u·iataha.
