TURA: India a·songni gipin biaprango gitan Meghalaya a·dokoba ta·rakbee COVID-19 giproroengahani gimin ja·delgimin manderangko tika su·na gita East Garo Hills a·jao Special COVID Vaccination camp-rangko a·bachengataha.
COVID-ni tikako su·gipa dolrang mijal Bristibar saloni a·bachenge Williamnagar-ni dingtang dingtang biaprango tikarangko su·na a·bachengataha.
Koborko on·ani gitade, skanggipa dol mijal Bristibar saloni a·bachenge Williamnagar Main Market sambao donggipa Government Town LP School-o tikarangko su·na a·bachengaha aro gnigipa dol, Williamnagar Supermarket sambao donggipa Williamnagar Girls’ UP School-o tikarangko su·na a·bachengskaaha.
Tikarangko pring 11:00 bajioni su·na a·bachengengani gimin bilsi 45 badegimin pilak manderangkon ia kosako janapgimin biaprangona re·ange COVID-ni tikarangko su·e ra·china gitaba East Garo Hills a·jani Deputy Commissioner Swapnil Tembe didiataha.
