Shillong: Chief Minister, Conrad K Sangma, Deputy Commissioner-rang aro health official-rang baksa mijalo video conference ka·e a·dokni pilak district-rango COVID-19 sabisi obostani bidingo chanchirimangaha.
A·doko salantian sabisi man·anirang batrorotaie obosta bilongenga indiba mikkangchi sabisiko chel·chakna man·a gita da·o kragipa champengani cholrangko dakenga, Chief Minister, Conrad K Sangma aganaha. “COVID protocol-ko rake ja·rike aro an·tangtangko tika su·e Delhi Mumbai-rango ong·enggipa obosta gita jedakode ong·janwa chinga chel·chak-champengani ja·kurangko de·na nangengaha,” ua aganaha. Manderang simsakanirang komiaha je niamrangko ja·rikangna nangtaigen, ua agandapaha.
Chief Minister lock-down ka·ani gimin aganao maikai tangka-paisani obostarang aro be·en-bimangna naljokaniko ja·rikna nangchongmotani gisepo nigrike champeng-atanirangko komiatna jotton ka·enga ine ua aganaha. COVID samko ra·anirango komibatgipa-rangni gisepo a·dok ong·enga aro re·baenggipa sal 10 salrango sam on·angani gimin sorkarini chanchiani ong·gen, ua u·iataha. “Mongsong-batgipa biaprangko aro tika su·na nangchongmotgipa dolrangko ma·sie ra·e re·baenggipa salgni salrango COVID sam tika su·na lak 6.5 choligipa manderangko tika su·na chinga nisan ka·enga,” ua aganaha.
Tika su·na bilsi gapgipa manderangko re·bae an·tangtangko tik su·echina aro Dorbar Shnongs, headmen, toromni dilgiparang gita dingtang dingtang dolrangko aro daitoko jako ra·e kam ka·giparangko tik su·ani bidingo awareness-ko ong·atao jak on·pachina dal·e ra·china ua didiangaha. “Sam bilsokgijagipana be·ena gipin sadapani gri chu·gimik naljokgipa ong·a aro sam ra·e ontimiti saani ja·mano ua mande test ka·o positive ong·naba donga aro jemangan tika su·ja uamangko tosusae siani sakki dongja,” ua aganaha. Tika su·ani ja·mano COVID-ni niamrangko manderang ja·rikna nangkugen, ua aganaha.
Chief Minister ja·mano songjinmani bang·a biap-rangona re·angaha jeon tika su·enga aro uni samni bidingo kena jajrengani-rangna manderang baksa agangrikaha.
