Shillong: Da·ororo India a·songo aro Meghalaya a·doko changsatai COVID-19 sabisi man·giparang re·anggipa bilsina batpile jelbatrikrikengako champengsona namen neng·nikengani a·sel, sabisini jelbatrikrikengako komiatna ja·ku de·ani bak gita East Khasi Hills, Shillong-ni District Magistrate, mni Surkobar sal, April 23, 2021 tarikoni a·bachenge, Shillong Golflink-o Robibar changantio songre-songbatbagipa aro songjinmaoni rona re·bagipa manderangko tom·dake rona man·jana gita Meghalaya Epidemic Diseases, COVID–19 Regulations, 2020-ni Regulation 3-o pangchake mikkangchi gitalgipa hukumko on·angkujaskal section 144 CrPC-ko ra·gatangaha.
East Khasi Hills District a·jaona gipin a·dokrangoni re·bapilgiparang aro uamang baksa sepangbate dongenggipa manderango ta·raken covid-19 sabisi giproroengani a·sel, sabisini jelroroaniko champengna gita a·dokona songre-songbatbagipa manderangko champengsona re·anggipa April 21, 2021 tariko a·dok sorkarini didiatgimin hukumo pangchake songre-songbatgiparangni roram biap ba (tourists spot)-rangko chipatgipao pangchake, Shillong songjinmao manderangni rorongbatgipa Golflink-koba Robibar changanti chipchina gita hukum on·angskaaha.
Ua biapko chipchina gita hukumko on·ataniara, Shillong Golflink-o chutini salrang, chong·motan Sonibar aro Robibar-rango songjinmani aro gipinchini songrebagiparang tom·dake roronga ine nikna gita man·ahani giminsa da·ororo skangna batpile covid sabisini obostarang namjabatengani a·sel, sabisi jelbatrikrikaniko champengani bak gita manderangni roram biapko chipate dona miksongskaaha ineba koboro janapataha
