SHILLONG: Meghalaya a·dokoba ta·raken COVID-19 giproroengahani gimin an·tangtangni chu·onggijanirangko pa·sike dongaigija sabisini giproroaniko warachakanio jakko on·tokchina gita Meghalaya a·doko donggipa pilak hospital-rang aro health centre-rangko a·dokni gitcham chief minister aro Congress dolni dilgipa Mukul Sangma didiataha.
Shillong songjinmani North Eastern Indira Gandhi Regional Institute of Health & Medical Sciences (NEIGRIHMS)-o sagiparangko sannanio jakchakjaenga ine pa·sikenba, COVID man·giparangko ia hospital-ona watatjachina NEIGRIHMS-ni Director aganahani gimin a·dokni gitcham chief minister, ia kattarangko aganskaaha.
“Pilakan nanggitikan somoirangona tarisamsona nanga aro darangba iandakgipa obostani somoirango pa·sikani kattarangko aganna nangja,” ine opposition dolni dilgipa aganaha.
NEIGRIHMS-o COVID-ko warachakna sorkarini maming dakchakanirangko man·jaengani gimin sagiparangko sannanio neng·nikanirangko man·na nangenga ine NEIGRIHMS-ni director aganahachim.
Indake ong·engon, sajinmarangni somoiode, sorkari ba private hospital-rangba pangnan dakchakanirangko on·na nanga ine Congress dolni dilgipa Mukul Sangma parakataha.
“Delhi-o ong·enggipa obostarangko niate nibo. Ua biaprango da·o obostarang namjabatroroengaha aro an·chingba da·onin mikraksojagenchimode apsan dakgipa obostarangko chagrongnaba gnang,” ine ua pilak health centre-rangkon tarie dongchina didiataha.
Mikkangchi maidakgipa obostarangko COVID ra·bagen darangba ma·sisokuja ine talatangengon, “NEIGRIHMS-san ong·aija, civil hospital, private hospital ba je hospital-ba ong·china, sorkari pilak hospital-rang baksa agangrike tarisamsona nangchongmotenga,” ine Sangma aganaha.
