TURA: Meghalaya a·dokni Chief Minister Conrad K Sangma-ba Sombar salo, Tura-ni Lower Balsanang-o donggipa Soksanang LP School-ona re·ange COVID-19-ni gnigipa tikako su·e ra·angaha.
Meghalaya a·doko aro Garo Hills-oba ta·raken COVID-19 giproroengahaoba, bilsi 45 badegimin manderangoni bang·batan hospital-rangona re·ange COVID-ni tikarangko su·tokjaengani gimin, tika su·kugijagipa manderangna cholko on·na gita Sombar saloni a·bachenge salgittamna Health department-ni manderang, Tura jillani ning·o donggipa dingtang dingtang gittimrango tikarangko su·na a·bachengatahachim.
West Garo Hills a·jani Deputy Commissioner Ram Singh-ni u·iatani gitade, ia chango COVID-19 ta·rakbate giproroengoba aro namen kenbatgnigipa ong·engoba Tura jillao bilsi 45 badegimin manderangoni komibeoba sak 5500-mangni gita ia COVID tikarangko su·e ra·tokkujaengani gimin, tika su·kugijagipa manderangna cholko on·kuna gita dingtang dingtang gittimrango Sombar saloni Budabr salona, salprak ka·e tikarangko su·angenga.
Indake ong·engon, Meghalaya a·dokni Chief Minister Conrad Sangma-ba da·omiting Tura-on ong·kuengani gimin an·tangni gnigipa tikako Sombar salo su·e ra·angjolaha.
Bang·a manderangan ia COVID-ni tikako ma·sisrete tikarangko su·na kentokengani gimin ua mamingnaba kengija an·tangtangni naljokgnina ia tikarangko su·e ra·china gita gipinrangkoba didiataha.
