GHADC-o Sixth Schedule-ni niamrangko taridapchina GSU dabia

TURA: Garo Hills Autonomous District Council (GHADC)-ni kamrango aro GHADC election-rango Tribal ong·gijagipa manderang bakko ra·na man·jana gita GHADC-oba ta·raken Sixth Schedule-ni niamrangko taridapchina Garo Students Union (GSU) Eastern Zone dabiangaha.

Iani bidingo GHADC-ni chief executive membor (CEM)-na sedoatengon, GHADC-o Tribal ong·gijagipa manderangni bak ra·aniko Garo Hills-o songdongenggipa pilak Tribal jatrang aro mongsongbate A·chikrang jegaltokenga aro GHADC-o Tribal ong·gijagipa manderangni bak ra·aniko champengna gita ta·raken Sixth Schedule-ko taridapna nangenga ine GSU-EZ-ni president Saljrang Tengrik R Marak parakataha.

Garo Hills-o songdongenggipa A·chikrangna, GHADC-o dingtang electoral roll-ko tarichina gita aro Garo Customary Law (GCL)-ko ta·raken be·en pil·atchina gitaba GSU-EZ dabiangaha.

Indake ong·engon, GHADC-o kam ka·enggiparang batanggimin ja 33-ni dormaharangko man·kujaengani a·sel bang·en neng·nikanirangko chagrongna nangtokengaha ine GSU-EZ-ni president talatangenba, GHADC-o kam ka·enggiparangna ta·raken ia dormaharangko on·china GHADC-ni gital CEM aro executive committee-ko didiataha.