TURA: Meghalaya a·doko ta·rakbee COVID-19 giproroengahani gimin May 1 tarikoni 10 tarikona Shillong, Tura aro Jowai-o manderangni kam ka·anirangko, re·ruraanirangko, anti cha·anirangko sorkari champengatahani gimin West Garo Hills a·jaoba ia salrango ja·rikna nangenggipa niamrangko West Garo Hills a·jani Deputy Commissioner, jinmana u·iataha.
A·bachengo u·iatgimin gitan skul, college aro university-rangko chipe donangkugen aro ia salrango jinma tom·anirangko ong·atna man·jawa. Bia ka·ani aro mande sianirango jinma tom·engon, district administration-oniko permission ra·chenge sak 30-na bate manderang tom·na man·jawa ine Deputy Commissioner u·iataha.
Ia salrangni gisepo tourist-rangni a·dokona re·baanikoba champengataha aro pilak tourist spot-rangkoba chipe donanggen.
West Garo Hills a·jani ning·o donggipa pilak border haat-rangkoba ia salrangni gisepo chipe donna nanggen aro bazar antirangoba nangchongmotgipa me·su samjakrangnade agrede palna sim·na man·jawa.
May 1 tarikoni May 10 tarikona kal·susaanirangkoba ong·atna man·jawa aro private office-rangkoba chipe donna nanggen indiba nangchongmotgipa kamrangko ka·enggiparangde dongimin niamrango pangchake kamko ka·na man·gen.
Manderangko salruragipa garirangna dongimin niamrangni gimin janapatengon, bus, sumo, auto, maxicab aro uandakgipa garirango bakbrioni baksana bate manderangko gatna man·jawa indiba sanna bananina, nanggitikanina, tika su·anina, porikka seenggipa chatro chatrirangna, skigiparangna aro porikkao kam ka·enggipa manderangnade maming champengani dongjawa ine Deputy Commissioner u·iataha.
West Garo Hills a·jao aro mongsongbate Tura jillao nangchongmotgipa dokkanrangko Tura Municipal Board (TMB)-ni dongimin niamrango pangchake pring 8:00 bajioni attam 5:00 bajiona kulina man·gen.
