SHILLONG: India a·songni gipin biaprango gitan Meghalaya a·dokoba COVID-19 batrikrikengani a·sel manderang aro mongsongbate poraienggipa chatro chatrirang neng·nikanirangko chagrongna nangtokengani gimin skul aro college-rango poraienggipa chatro chatrirangna fee-rangko 25 percent-chi komiatchina gita Meghalaya a·dokni National Students’ Union of India (NSUI), a·dok sorkario dabiangaha.
Iani bidingo Meghalaya a·dokni Education Minister Lahkmen Rymbui-na sedoatengon, COVID giproroengani a·sel skul aro college-rango class-rangko ra·na man·jae, chatro chatrirang neng·nikanirangko chagrongna nangtokenga aro a·dokni mitam biaprangode lockdown-ko ra·gatengani a·sel bang·bata manderangan janggi tangani cholrang dongjaenga ine NSUI-ni president Bansharailang Pyngrope parakatenba, chatro chatrirangni namgnina skul aro college fee-rangko 25 percent-chi komiatchina didiangaha.
NSUI-ni parakatani gitade, lockdown-ko ra·gatani a·sel hajira ka·e aro me·su samjakrangko pale cha·paenggipa manderangde maming cholrang dongjae neng·nikanirangko man·tokna nangenga aro dedrangni skul fee-rangko gamna gitaba neng·nikanirangko man·tokengachim.
Indake ong·engon, skul aro college fee-rangko komiatgenchimode chatro chatrirang, an·tangtangni poraianirangko chu·sokatna cholrangko man·an baksana mikkangchi rakbate poraina didianirangko man·gen ineba NSUI-ni president parakatenba, chatro chatrirangni nanganirangko ma·sichake skul aro college fee-rangko komiatchina a·dok sorkariko didiataha.
