May bon·achide M’laya-o COVID active case sak 10,000-mang gapenaba gnang

SHILLONG: Meghalaya a·doko COVID-19 ta·raken batrikrikengani gimin ia May jani bon·angachibarade COVID-19 man·giparang sak 10,000-mang gapenaba gnang ine a·dokni Health Secretary Sampath Kumar parakataha.
Health officer-ni parakatani gitade, re·anggipa Sonibar salona kingking Meghalaya a·doko COVID-19 man·e dongenggiparang sak 4,338 gapengahachim aro uandaken a·doko COVID man·giparang gimik sak 22,763 ong·ahachim. Mija Sonibaro a·doko sak 560 manderang COVID-ko man·dapaha aro sak 21 manderang COVID-ni a·sel siangtaia ineba Kumar parakataha.
A·doko COVID-19-ni batrikrikengani a·selko talatangengon, batanggimin antirango COVID-19-na porikka ra·e nianirangko bariatahani gimin da·o a·doko COVID-19 man·giparangko ma·sina man·engaha ine Health Secretary parakataha.
“Chinga a·dok gimikon COVID-19-na porikka ra·aniko baridapataha. Bang·bata biaprangon da·o Rapid Antigen Test (RAT)-chi porikkarangko ra·enga aro ia sabisiara batninggipa sabisi ong·ani gimin da·o chinga porikkarangko ra·e COVID man·giparangko ma·sina man·engaha,” ine Sampath Kumar parakataha.
Health official-ni parakatani gitade, gipin a·dokrango gitan da·o Meghalaya a·dokoba COVID man·giparang bang·engahani gimin sanna banani cholrang chu·ongjana a·bachengengaha aro bakan hospital-rangoba biaprangko man·na neng·gnok.
“Hospital-rango sanna banani cholrang aro palangrang gapna a·bachengengaha, uni gimin sakantian an·tangtangko naljoke rakkina nangengaha,” ine Kumar parakataha.
Indake ong·engon, COVID-19-ni batrikrikaniko champengna manderangna mikrakatanirangko on·na miksonganio a·dok sorkari, dingtangmancha COVID-19-ni state coordination communication committee-ko songaha ine sorkari official parakataha.
“Committee-ko Sonibar salo songaha aro ia committee-o DHS, NHM aro DIPR-ni membor-rangko donataha. Manderangna COVID-ni bidingo mikrakatanirangko on·na man·na gita ia committee, dingtangmancha songbad segiparangna aro kobor ra·timgiparangna training-ko on·gen,” ine Health official parakataha.