TURA: A·songni Prime Minister Narendra Modi-ni on·atgipa Farmers scheme, game ge·e cha·enggipa manderangona somoi gita sokbajaenga ine Tura-ni BJP MDC Bernard N Marak matnangataha.
Marak-ni parakatani gitade, ia scheme-ni SMS-rang, game ge·e cha·enggipa manderangona sokbaenga aro iani a·sel game ge·e cha·giparang aro ia scheme-ni namgniko man·enggipa manderangni gisepo jajaanirang ong·katenga.
“Game ge·e cha·enggipa manderang SMS-kode man·soenga indiba uamangni account-rango tangka paisarangde napkujaenga. Iani a·selan game ge·e cha·giparang aro ia scheme-ni namgniko man·enggipa manderang jajaanirang ong·katenga maina tangka paisarangko on·atkujama ma uamang tol·gipa SMS-rangkosa ma·soengama ine jajatokengaha,” ine BJP MDC parakataha.
Ia scheme-ara ma·mong sorkarini kangal cholgrirangna ra·gatgipa scheme-sa ong·ani gimin BJP sorkarini on·atenggipa scheme-rangko somoi gita sokate on·china nangchakegipa official-rangko didiangengon, Pradhan Mantri Garib Kalyan Anna Yojana (PMGKAY), Pradhan Mantri Awas Yojana (PMAY), Individual Household Latrine (IHHL) aro uandakgipa gipin ma·mong sorkarini scheme-rangoba apsan manderang manderang u·iatanirangkode man·soenga indiba tangka paisarangkode somoi gita man·tokjaenga ine Marak matnangataha.
Ia scheme-rangara ma·mong sorkarini kangal cholgrirangna on·enggipa scheme-rangsa ong·ani gimin scheme-ni tangkarangko somoi gita sokatna nanga ineba Marak parakataha.
“Kamrangko ka·anio iandake ja·donggatanirang donggenchimode chinga BJP dolni gita am·sandie ja·kurangko de·anggen,” ineba Tura-ni BJP MDC, mikrakataniko on·angaha.
