SHILLONG: Meghalaya a·doko COVID-19 man·gipa manderangko nambate sanna aro nirok sandina man·na gita isolation centre ba dingtang donani biaprangko kulichina UDP-ni chief adviser Bindo M Lanong, a·dokni Chief Minister Conrad K Sangma-na sedoataha.
Lanong-ni parakatani gitade, songo noko an·tangtangni quarantine centre-rangko kulichina songni dilgiparangko didianiara nama ong·jaenga aro sorkari an·tangan COVID man·gipa manderangko nambate nirok sandina gita isolation centre-rangko kulina nangenga.
“Anga an·tangde sorkarini, dingtang dingtang songrango aro gittimrango quarantine centre-rangko kulichina songni nokni dilgiparangko agananiko ong·e nikjaenga maina ia kamkode sorkari an·tangan jako ra·na nangenga,” ine UDP-ni dilgipa parakataha.
Kamtangko jako ra·na gisiko nangjaenga ine sorkariko matnangatengon, songo noko ba gittimrango quarantine centre-rangko kuligenchimoba COVID man·giparangko sanna gita maming cholrang dongja aro doctor nurse-rangba dongja ine Lanong parakataha.
“Uni gimin ia kamko songni nokni dilgiparangnasa pakwate on·aigija sorkari an·tangan jako ra·na nanga aro COVID man·giparangko nambate nirok sandina isolation centre-rangko kulina nanga,” ine UDP-ni chief adviser parakataha.
