Niam gri napsrukaniko champengna police camp-rangko songdapchina Dy CEM didia

TURA: Garo Hills aro Assam a·dokni simarango chu·onga gita police camp-rang dongjani a·sel Assam a·dokoni manderang, West Garo Hills a·jani a·kawe jolrango napdrabana jotton ka·enga ine Garo Hills Autonomous District Council (GHADC)-ni deputy Chief Executive Membor Nikman Ch Marak parakatenba, ia jolrango police battalion camp-rangko kulidapchina gita Meghalaya sorkariko didiataha.
Iani bidingo Meghalaya a·dokni Chief Minister Conrad K Sangma-na sedoatengon, chengo a·dok damgnini songgrikaniko pe·e Assam sorkari, Meghalaya a·dok ning·o aro mongsongbate Garo Hills ning·ona napdrabae nokrangko rikna jotton ka·enga ine GHADC-ni deputy CEM parakatenba, iani bidingo ta·raken ja·kuko de·china Chief Minister-ko mol·molataha.
Marak-ni parakatani gitade, ia jolrango Tikrikilla police station damsamangmangsan dongaiani a·sel indita biap dal·ako name nirok sandina man·jaenga aro uandaken Assam-oni manderang Garo Hills ning·ona napdrabae ma·manti ong·gija kamrangko ka·na chol man·enga.
B Mahal jolrango bang·bata biaprangkon indin jakkalgija donengani gimin Assam-oni napdrabaenggipa manderang, ia biaprango nokrangko aro bagan barirangko dakna chol man·enga ineba deputy CEM parakataha.
“Uni gimin ia jolrango ong·gija dakanirangko champengna man·na gita ia jolrango police battalion camp-rangko kulina nanga aro ian jolo songdongenggipa chadamberangnaba kamrangko ka·e cha·na cholko on·ani gita ong·gen,” ine chief minister-na seatgipa chittio Marak parakataha.
Sorkarini kamrangko ia jolrango songdongenggipa manderangona sepangbatatna gita gital bikotgipa Raksamgre civil sub-division-ko chu·gimik kam ka·china gitaba GHADC-ni deputy CEM didiataha.
Assam a·dokni manderang Raksamgre civil sub-division-ni ning·o donggipa songrangona napdrabae nokrangko aro ma·manti ge·a gamanirangko dakenga ine badi ka·anirangko man·ahani gimin adita salrangna skangsan GHADC-ni deputy CEM Nikman Ch Marak, ia jolrangona re·angenba songni nokni manderang baksa agangrikeahachim ine nikna man·a.