TURA: South Garo Hills a·jaoba COVID-19-ko man·giparang batrorobaengani gimin sabisini giproroaniko champengna man·na gita Sombar salo, dingtangmancha COVID-19-ko warachakna dongimin niamrangko ja·rikna nangengani gimin jolo songdongenggipa manderangna agan-talate on·aniko dakangaha.
Ia awareness program-ko Baghmara bazar-o ong·atangaha aro ia program-ko ong·atanio South Garo Hills a·jani Additional Deputy Commissioner MT Sangma, jinmana aganprakengon, coronavirus-ni giproroaniko champengna man·na gita aro manderangko ia sabisioniko naljoke rakkina man·na gita sorkarini dongimin niamrangko ja·rikchina jolo songdongenggipa mande sakantikon didiangaha.
COVID-19-ko warachakna dongimin niamrang, jekai mask-ko kinggni ganani, jakrangko rongtalatjringani, saksa sakgipinoni chel·tanggrike dongani aro COVID-ni tikarangko su·e ra·anichisan COVID-19-ni batrikrikaniko champengna man·gen ineba Sangma aganaha.
Ia program-ko ong·atanio Baghmara police station-ni officer-in-charge Simseng A Sangma-ba COVID-19-ni batrikrikaniko champengna dongimin niamrangni gimin jinmana talataniko on·angengon, niamrangko pe·genchimode mai dakgipa sastirangko man·gen, uarangni bidingo agan-talate on·angskaaha.
Ia program-ko ong·atanio Baghmara-ni Additional Surveillance Officer Dr Bonie D Shira, COVID-19-ni chinrangni bidingo aro COVID-ni tikarangko su·na nangani gimin manderangna talate on·angskaaha.
South Garo Hills a·jaoba salantian COVID-19-ko man·giparang batrorobaengahani gimin sabisini batrikrikaniko champengna gita May 24 tarikoni June 1 tarikona chu·gimik lockdown-ko ra·gatangahachim ine nikna man·a.
