TURA: East Garo Hills a·jao bilsi 45 batgimin manderang, COVID-19-ni tikarangko su·e ra·na gisiko nangjaengani a·sel ja·delgimin manderangna kenchakna nangani ong·enga ine East Garo Hills a·jani Deputy Commissioner Swapnil Tembe parakatenba, bilsi 45 batgimin manderangko re·bae tika su·e ra·china didiataha.
Deputy Commissioner-ni u·iatani gitade, ja·delgimin manderangnan ia COVID-19-ara kenchakna nangbatengani gimin batanggimin jarangonin East Garo Hills a·jaoba bilsi 45 badegimin manderangko tika su·engahachim indiba bilsi 45 badegimin manderangoni bang·batan ia tikako su·e ra·na kentokengani a·sel da·onan bilsi 45 badegimin manderangko tika su·ani 41 percent-san ong·engpitichim.
Indake ong·engon, tikako su·anichisan ia kenbegnigipa sabisioniko naljoke rakkina man·gen ine East Garo Hills a·jani Deputy Commissioner talatangenba, a·jao bilsi 45 badegimin pilakkon tika su·chakenggipa centre-rangona re·bae tikarangko su·e ra·china didiataha.
