TURA: West Garo Hills a·jao re·anggipa May 21 tarikoni June 1 tarikona kingking chu·gimik curfew-ko ra·gatengani gimin curfew-ni somoirango Tura bazar-ni wholesaler-rangba da·o Sombar, Budbar aro Sukrobar salrango pring 5:00 bajioni attam 1:00 bajiona kulina man·gnok ine West Garo Hills a·jani Deputy Commissioner u·iataha.
Deputy Commissioner-ni u·iatani gitade, Tura jillao dingtang dingtang gittimni seokgimin dokkanrangsan ia salrango kulina man·gen indiba West Garo Hills a·jani gipin biaprangode galamal, me·su aro be·en palgiparangba kulina man·gen.
Curfew-ni somoio gari gorarang nangchongmotana agre re·rurana man·jawa indiba curfew-ni somoio nangchongmotgipa bosturangko salbaenggipa garirang, Tura jillao manderangni nokona bosturangko sokate on·enggipa garirang, 1917 dolni garirang, medical, police aro uandake nangchongmota kamrangko ka·enggipa dolrangkode champengani dongjawa ine DC u·iataha.
