SHILLONG: Meghalaya a·dokni skotong songjinmao donggipa Raj Bhavan-o sak 25 manderang, COVID-19-na porikka ra·anio positive ong·dapenba, COVID-19 man·giparang gimik sak 43 gapengaha ine kobor on·aha.
Raj Bhavan secretariat-oni koborko on·atani gitade, batanggimin somoirango COVID man·gipa manderang baksa kam ka·rimgipa aro apsan dongrimgipa manderangkoba COVID-19-na porikka ra·e niangtaion sak 25 manderang positive ong·dapaha aro uandaken da·o Raj Bhavan-o COVID man·giparang gimik sak 43 gapengaha.
Re·anggipa May 24 tarikona kingkingde Raj Bhavan-o COVID man·giparang sak 18-sankuengachim.
“Raj Bhavan-o gimik sak 80 manderangko COVID-19-na porikka ra·taiaha aro ia sak 80-oni sak 25-de positive ong·aha. Da·o Raj Bhavan-o kam ka·enggipa aro uamangni nokdangrangoni COVID man·giparang gimik sak 43 gapaha,” ine Raj Bhavan secretariat-ni official-rang parakataha.
Ia sak 43-oni sak 10-de bilsi 15-na komikuenggiparang aro sak 3-de gipin saani donggiparang ong·aha ineba official-rang parakataha.
Raj Bhavan official-rangni u·iatani gitade, batanggimin jaoba Raj Bhavan-o sak 28 manderang COVID-19-ko man·aha aro unoni sak 23-de nampilna gita man·ahachim.
Ia jao COVID-19 man·gipa manderangoni bang·batan main building-o kam ka·giparang aro a·dokni Governor Satya Pal Malik-na dangdike on·enggipa manderang ong·a ineba u·iataha.
