SHILLONG: Mijal Bristibarni salni bako a·doko sak 594 manderang COVID-oni nampilaha aro sak 552 manderang COVID man·daptaiaha, unomitingo COVID man·e sianggiparangba mijalo aditan komiaha, mijalo sak 9 manderang sidpaha.
Mijalo sak 552 COVID man·daprangoni EKH-o sak 246, WGH-o sak 93, WJH-o sak 59, Ri-Bhoio sak 29, NGH-o sak 27, SWKH-o sak 22, SGH-o sak 21, EGH-o sak 20, WKH-o sak 15, EJH-o sak 11 aro SWGH-oni sak 9.
Mijal apsan somoion sak 594 manderang COVID-oni nampilskaaha uamangoni EKH-o sak 288, Ri-Bhoio sak 109, SWKH-o sak 47, EGH-o sak 32, WGH-o sak 31, WJH-o sak 31, EJH-o sak 18, SWGH-oni sak 18, WKH-o sak 12, SGH-o sak 7 aro NGH-oni saksa.
Unomitingo mija gipin salrang baksa tosusaatgenchimode a·doko COVID man·e sianggiparang mijalo on·tisa komiangaha. Batanggimin konta 24-ni gisepo a·doko sak 9 manderang COVID man·e siangdpaha. Uamangoni East Khasi Hills-o sakbri, West Garo Hills-o sakgni, West Jaintia Hills-o sakgni aro South West Garo Hillso saksa.
Meghalaya a·doko COVID man·giparang mijalona gimikchide sak 37,149 gapangaha, uamangoni sak 30,172 manderang COVID-oni nampilaha aro sak 625 manderang sabisio siangaha, a·doko COVID man·giparang da·oba sak 6,352 dongengkua.
