SHILLONG: East Jaintia Hills district-ni Umpleng-o niamgri koela bikotenggipa a·kolo sakbonga manderangni gimaani da·o sallbri batangpilengaha, indakoba uamangni gimin da·alona kingking maming kobor dongkujaenga.
East Jaintia Hills a·jani koela a·kolo gimagipa mande sakbongako sandina kamrangko ka·tokengon, National Disaster Response Force (NDRF) dolni sak 24 sipairangba gimagipa manderangko sandina sokbaaha ine Bristibar salo a·dokni Chief Minister Conrad K Sangma parakataha.
Chief Minister-ni parakatani gitade, manderangni janggiko jokataniara namen nangchongmotgipa ong·a ine ma·siengani gimin sorkari aro district administration, koela a·kolo gimagipa manderangko jokatna rake kamrangko ka·enga.
“Koela a·kolo gimaenggipa manderangko sandina NDRF-ni sipairangba ua biapona sokbaaha aro ua biapona Home Minister-ko re·ange nieachina anga ge·etaniko on·manaha,” ine Chief Minister parakataha.
Mikkang namangengahani gimin koela a·kolo gimaenggipa manderangko sandina a·bachengna man·gnok ineba Chief Minister an·tangni ka·dongchakenganiko parakataha.
A·doko niam gri koela bikotanirangko champengna man·na gita dingtang dingtang koela a·damrango niam gri koela bikotanirangko am·sandichina opposition Congress dolni dabienggipani bidingo janapatengon, iani bidingo sorkari chanchie ja·kuko de·anggen ine Chief Minister parakataha.
A·doko niam gri koela bikotenggipa manderangni kosako sorkari nanga gita ja·kurangko de·anggen ineba Chief Minister, ku·rachakaniko on·angtaiaha.
“Niam gri dakanirangko champengna a·songo niamrang donggenchimoba manderang ong·gija kamrangkode ka·aia. A·songo mande so·otako champengna niamrangko donmanahaoba manderangko so·otkuaia,” ine Chief Minister parakataha.
