Batanggimin jagnio bi·sa an·pakgipa man·giparangni siani tang·doanga

SHILLONG: A·doko batanggimin ja gittam mangni somoio ma·giparangni bi·sa an·pakani somoio sianirang bang·ani gimin Assembly Committee on Women’s Empowerment, changsatai uamangni suk ong·gijaniko parakaha.
Health department-ni official-rang baksa video gita mikkang nikgrike chanchirimani ja·mano aganengon, batanggimin March aro April jagnini gisepo Maternal Mortality Rate (MMR) ba ma·giparangni bi·sa an·pakani somoio sianirang bilongangaha, jeon March aro April jagnini gisepo sak 13 ma·giparang, bi·sa an·pakani somoi uamangni janggirangko gimaataha aro da·o May ja-ni MMR report-ko department-oniko sengenga ine Committee-ni chairperson, Ampareen Lyngdoh aganaha.
Sianggiparangni gisepo, East Khasi Hills  district-o sak 5, West Garo Hills-o sak 6 North Garo Hills aro South West Khasi Hills district-rango sakprak.
Indake ong·engon, ian simsakna nangbeenggipa kam ong·enga, unigimin iani bidingo Health Department-ko niroke kam ka·china gita gita Committee, didianiko on·aha.
Tom·anio, Committee-na talatani gitade, da·ao dipet a·dokni 85 percent health worker-rang COVID tikarangko su·aha aro da·o jemangan tika su·na gita jajaanirangko man·engachim, uamang baksaba agangrike kamrangko ka·anggen ineba Health department, committee-na talatahachim.
A·doko COVID man·e sianggiparangoni sak 300 mangni gitade COVID tika su·kugijagiparang ong·a, tika su·anian sabisioni naljokna nambatgipa ong·engani gimin a·dok gimikon tika su·aniko simsakatna nanga ineba Ma Lyngdoh aganaha.
A·doko COVID man·e sianggiparangna sorkarini gita ka·sae gampilskaanirangko dakani bidingo aganengon, ex-gratia ba sigipana ka·sae on·enggipa tangkako laksaona batatna nanga ine Committee member, HM Shangpliang aganaha.
An·o donggipa nurse saksani COVID man·e siani bidingoba Committee, chanchirimaniko dakaha, aro department-ni gita mai dakachakaniko on·na gita man·gen, sianggipani nokdangna dakchakaniko on·china gitaba Committee, Health Department-ko aganaha.
Indake ong·engon, oko dongenggipa health worker-rangkode noktangtangoni kamrangko ka·atna on·aichina aro uamangni betonrangko den·jachina gitaba Committee, pilak hospital-rangko mol·molaha, unigisepo bilsi 18-44 ong·gipa manderangna COVID tikarangko chu·onga gita a·doko man·jaengani giminba Committee, suk ong·gijaniko parakaha.