SHILLONG: Meghalaya Energy Corporation Limited (MeECL)-ni Shillong aro Jaintia Hills distribution circle-rangko Rural Electrification Corporation (REC)-na pakwatani bidingo Finance department-ni talate on·anirang chu·ongkujaenga ine BJP-ni dilgipa aro a·dokni Cabinet Minister AL Hek parakatenba, iani bidingo nambate chanchirimtaianiko dakchina didiangaha.
“Iani bidingo Finance department, chu·onga gita talataniko on·kujani gimin chinga BJP dolni gitaba chanchirime nanga gita ja·kurangko de·anggen,” ine Hek parakataha.
Ru·uta bilsirangonin MeECL-ni kamrango olgrokanirangko nikna man·engahani gimin MeECL-ko gital daktaina nangengaha ineba a·dokni BJP Minister parakataha.
“Power department, kamrangko name taripiltaina nangenga. Anga saksa BJP dolni dilgipa ong·e, je kamko ka·genchimoba manderangni namgninasa ka·china nangnikenga. Sorkarini ja·ku de·anirang pilakan namgninasa ong·na nanga aro chinga iani bidingo chanchirime kamko ka·anggen,” ine Hek parakataha.
Indake ong·engon, MeECL-ni distribution circle damgniko REC-na pakwate on·na manchianiko People’s Democratic Front (PDF)-ni president Banteidor Lyngdoh-ba raken jegalataha aro ian MeECL-nasan ong·aigija a·doko songdongenggipa manderangnaba nangchakeaniko ra·bagen ine parakataha.
Iandake sorkarini ja·ku de·na miksonganiko bang·bata MLA-rangan namniktokjaenga ineba Lyngdoh parakataha.
“Oe beben, MeECL-ko gital daktainade nangchongmotenga indiba gipin company-rangchi chalaianide chol ong·jaenga. Iako chinga maming dakeba on·jawa,” ine PDF-ni president aganaha.
