SHILLONG: COVID-19 sabisi sajinmani ta·rake giproroani a·sel Meghalayao lockdown-ko ra·gatatani da·o sal 40 mang ong·nasipilengjok, indake Meghalayani skotong songjinmao donggipa bajar dal·batgipa Iewduh-o (bara bajar) dokkan dake cha·giparang, ramasamo pala simaniko dakgiparang, uandake a·dokni dingtang dingtang biaprango bading chiwale cha·giparang namen neng·nikaniko man·engaha.
Dokkan dake cha·giparangni, uamangni janggi tanganio chagrongenggipa neng·nikanirangko nikatenba, West Shillong-ni MLA, Mohendro Rapsang indake aganaha je sabisini giproroaniko champengna cholko dakan baksa apsan somoion, manderangni janggi tanganiona neng·nikaniko ra·bajanagipa cholrangko Sorkarini ra·gatako uamang nangnikenga.
“Chinga June 14 tarikona senggen, uni ja·mande dokkanrangko kuliatna adita cholrangko dakchina gita chinga Sorkariko agangen’’ ine Mohendro Rapsang aganaha.
Iewduh ba bara bajarni dokkanrangko da·sikkari gita odd even dake kuliatna man·gen aroba dokkan dakgiparangko Covid protocol-rangko ja·rikatna man·gen ineba Rapsang aganaha.
Rapsang-ni aganani gitade, bang·a dokkan dakgiparang aro ramasamo pale sime cha·giparang, uamangni salanti janggi tanganina Iewduh-o pangchaktoka, jemangonin mitamrangde uamangni neng·nikaniko MLA-na agan-janapeahachim.
Indakeba nikatna man·a je, ia bilsiode sorkarioni maming dakchakanirangko on·jani gimin, a·dokni bang·a kangal cholgri nokdangrangan neng·nikanirangko chagrongbeenga. Dokkan dake cha·giparangna agreba, parana gari sale cha·giparang apsandaken neng·nikanirangko mikkangchakna ga·akenga.
Meghalaya Joint Action Committee of Commercial Vehicle (MJACCV) chairman, Wandonbok Jyrwa-ni aganani gitade, East Khasi Hills-o sak 6000 mang taxi driver-rang donga aro a·doko gimikchide bol 25000 parana salgipa garirang donga, apsandaken kamai ka·na man·jaengba namen neng·nikaniko man·tokenga.
“A·doko lockdown-ko rang·gitik ra·gatatani a·sel chingoni bang·batan tarisona man·tokjaha” ineba Jyrwa aganaha.
Indake uamang sorkarina tax ba kajinarangkoba gamna nangani gimin, sorkari uamangna aditade dakchakna nangachim ineba ua aganaha.
“Labour department, jean chingoniko Tg. 500-ko ra·achim, uamangni chingni ia neng·skimiting somoio maming dakchakanikoba on·jaha,” Jyrwa agandapaha.
