TURA: Garo Hills Autonomous District Council (GHADC)-o tangka paisani gita neng·nikanirangko man·engmiting somoio chief executive membor (CEM)-na chief adviser-ko rakkidapaha ine badiaba badiaba songbadrango matnange seahani gimin nangchongmota kamrango agan-ku·pattianirangko ra·na man·na gitasa CEM-na chief adviser-ko songaha ine Bristibar salo GHADC-ni Executive Committee, talataniko on·angaha.
CEM-ni chief adviser, GHADC-na dangdike on·anio honorarium ba sitting allowance-rangko ra·na jechakaha indiba an·tangni kamna tangka gong 1/-ko ra·skana tik ka·aha ineba GHADC-ni Executive Committee parakataha.
“CEM-ni chief adviser Akki A Sangma, GHADC-o ong·enggipa obostarangko namatna kamko ka·gen inesa ia kamko ra·chakna kusi ong·aha,” ineba Executive Committee parakataha.
Indake ong·engon, high powered committee-ni chairman Rudreswar Momin-ba GHADC-o man·enggipa neng·nikanirangko namatkujaskal aro pilak grorangko matchotkujaskal honorarium ba sitting allowance-rangko ra·na jechakaha ineba GHADC-ni Executive Committee aro CEM parakataha.
Executive Committee-ni parakatani gitade, GHADC-ni CEM Benedic R Marak an·tangba, GHADC-o man·enggipa neng·nikanirangko namatkujaskal an·tangni dormahako ra·na jechakaha aro Garo Hills-o songdongenggipa manderangni namgnina kamrangko nambate ka·angna gita ku·rachakaha.
