SHILLONG: East Jaintia Hills a·jani Umpleng jolo donggipa Krem Ule-ni koela a·kolo gimaenggipa manderangko sandina gita Sonibar walo Indian Navy-ni chining ripgipa manderang Meghalaya a·dokona sokbaaha.
Sorkari official-rangni u·iatani gitade, Indian Navy-ni sak 13 sipairang, Sonibar walo, Khliehriat-ona sokbaaha aro ia sipairang, koela a·kolo gimaenggipa manderangko chining ripenba sandianggen.
Ia koela a·kolo gimaenggipa manderangko indita salrangni ja·manoba man·pilkujaengani gimin chining ripe sandianio dakchakna gita Indian Navy-ni diver-rangko watachina a·dokni Chief Minister Conrad K Sangma, Defence Ministry-na seatahachim.
Indake ong·engon, ia jolrangoba mikkarang dontonggija waengani a·sel ia koela a·kolo chirang tubatroroenga aro uandaken koela a·kolo gimagiparangko sandianio NDRF aro SDRF-ni sipairang, neng·nikanirangko chagrongna nangtokenga ineba sorkari official-rang u·iataha.
Ia koela a·koloniko bewalde chirangko pump-rangchi salope galna man·ahachim indiba mikkarang wataiahani a·sel chirang tubatangtaiaha ine official-rang parakataha.
