TURA: BJP-ni state president Ernest Mawrie-ni kosako matnange agananirangna Garo Hills-ni BJP dol, BJP-ni gitcham dilgipa KC Boro-ko chakchike dongchajawa ine Tura-ni BJP MDC Bernard N Marak parakatenba, mikkangchiba iandake matnangani kattarangko agantaigenchimode kachario badi ka·doanggen ine mikrakataniko on·angaha.
Tura MDC-ni parakatani gitade, Boro-ni constituency-o uni namgijagipa kamrangni a·selan BJP dolko manderang namniktokjahachim aro da·o uko BJP-oniko ra·galani ja·manoba ua ma·mong BJP-ni ra·chakgipa state president-ko matnangna jotton ka·skaengachim.
“2023 bilsini Assembly election-o BJP dol, Boro-ni constituency-oba chegipa ong·gen iana chinga Boro baksa kam ka·rimgipa gipin membor-rangkoba ra·galna gita see donengaha. Ia manderang skangonin BJP dolni namgnina ong·ja indiba an·tangtangni man·gnina kamko ka·ani a·selsa chu·sokgipa ong·chipna man·jaha indiba ia changode obostarang namen dingtanggnok aro chinga bang·bate seat-rangko chegnok,” ine Marak parakataha.
BJP dolo donge doltangni kosako kam ka·enggipa aro an·tangtangni man·gninamangmangsan chanchie kam ka·enggipa manderangko BJP district-ni dilgiparang aro district committee-rang on·atengaha aro ia membor-rangko da·o adita salrangni gisepon doltangoniko ra·galgnok ineba Tura-ni BJP MDC parakataha.
Marak-ni parakatani gitade, BJP-ni state president Ernest Mawrie, a·doko BJP dolko bilakbatatna gitasa rake kamrangko ka·enga indiba bang·bata dilgiparangan una chakpaaniko on·ani pal batesa uko matnangna jotton ka·skaengachim.
“Uni gimin BJP-ni kosako aro an·tangtangni man·gnirangna kam ka·enggipa membor-rangko chinga Garo Hills-ni BJP dol nie dongchajawaha aro ta·raken ja·kurangko de·gnok,” ine Tura-ni MDC parakataha.