SHILLONG: Meghalaya a·doko bi·sarangni COVID man·e sianirang batrorobaengon, da·o dipet Meghalaya a·doko bilsi 14-ni gisepo ong·gipa bi·sarang gimik sak 17 siangaha aro ia sak 17-oni sak 13-de batanggimin jasani gisepon siaha ine official-rang u·iataha.
Health department-ni COVID-19 dashboard-o see rakkiani gitade, 2020 bilsio ia COVID-19 giprorochengaoni atchidaldaloni bilsi 14 ong·gipa bi·sarang gimik sak 5,101 bi·sarang COVID-19-ko man·aha aro ia sak 5,101 bi·sarangoni sak 4,344-de nampilna man·aha indiba sak 17-de siangna gita nangaha.
COVID-ko man·gipa bi·sarangoni bang·batan batanggimin jasani gisepo man·aha ineba u·iataha.
Re·anggipa May 15 tarik dipet gimik sak 2,950 bi·sarang COVID-na porikka ra·anio positive ong·aha aro ia sak 2,950 bi·sarangoni sak 2,821-de nampilaha indiba sak 13 bi·sarangde siangskaaha.
Da·ororo bi·sarangba COVID man·tokengani gimin talataniko on·angengon, a·doko damgittam prefab paediatric hospital-rangko, Ganesh Das Hospital-o damsa, Tura-o damsa aro Jowai-o damsa kulina gita sorkari kamko ka·engaha ine a·dokni Health Minister AL Hek parakataha.
Ia hospital-rangko bakan rikna a·bachenggnok ine janapatengon, a·doko gittamgipa changna COVID giprorona skangan sorkari, nanga gita kamrangko ka·soengaha ine Health Minister parakataha.
