SHILLONG: Jagnimangna chipe donani ja·man, Meghalaya a·dok gimiko dal·batsranggipa wholesale market Iewduh ba Bara Bazar-ko Sukrobar sal dipet kulipiltaignok aro ia bazar ba anti cha·chakgipa biapko kulianio manderangna naljokaniko on·na man·na gita ia bazar-o dokkan dakenggipa aro palbadinge cha·enggiparangna district administration aro Hima Mylliem-ni Syiem dingtangmancha salgnina tika su·ani program-ko ong·atangaha.
Bara Bazar-o dokkan dakenggiparangna aro palbadinge cha·enggiparangna Budbar aro Bristibar salrango tikarangko su·e on·angaha aro bang·bata manderangan ia cholko ra·e tikarangko su·e ra·riktokaha.
Tika su·gijagipa manderangkode dokkanrangko kulina on·jawa ine sorkari mikrakataniko on·ahaoba, tikarangko su·china gita darangkoba drajaenga indiba an·tangtangko su·e ra·china didianisan ong·aia ine Hima Mylliem-ni Syiem talataniko on·angskaaha.
Indake ong·engon, East Khasi Hills Deputy Commissioner-ni u·iatani gitade, Sukrobar salo ia Bara Bazar-o donggipa dokkanrangoni 15 percent-kosan kulina on·angchenggen aro uandaken ia bazar-o donggipa dam 5000 dokkanrangoni dam 1,222 dokkanrangkosan kulina on·anggen. Iana agreba, salo ge 185 dokkanrangko aro ramasamrango palbadinge cha·enggiparangoni sak 184-ko palna sim·na gita on·anggen ine DC u·iataha.
