Me·surangko pakrurue galanina police aro district administration-ko NGO-rang jegala

TURA: Sukrobar salo A·chik ma·gipa saksani ramasamo palenggipa me·surangko police-rang, district administration-ni ge·etaniko man·e pakrurue galaha ine Garoland State Movement Committee (GSMC) aro Garo Students Union (GSU) suk ong·gijaniko parakatenba, ia me·chikmana uni me·surangni tangka paisarangko gamskachina gita district administration-o dabiangaha.
Koborko on·ani gitade, Tura-ni biap damsao A·chik ma·gipa saksa me·su samjakrangko pale, dokkanrangko chipna somoi ong·ahani gimin an·tangni bosturangko chipna a·bachengengahachim indiba uandakmiting somoio police-rang ua biapona re·baenba, ia me·chikmani me·surangko pakrurue galangaha.
GSMC aro GSU dolgnini u·iatani gitade, iani bidingo uamang police-rango sing·sandion, district administration-onin iandake somoi bate palenggiparangko nirok sandichina gita ge·etaniko on·manahani gimin police-rang, somoi bate palenggipa manderangkode a·rikgalna nangao ga·akaia ine aganchakaniko on·atskaaha.
Da·o dipet Tura jillao dokkanrangko pring 8:00 bajioni attam 1:00 bajionasan kulina on·engachim ine nikna man·a.
Indake ong·engon, iandake cholgri ma·gipa saksani palbadinge cha·paenggipa bosturangko kragija dake pakrurue galahani gimin GSMC aro GSU dolrang suk ong·gijaniko parakattokaha.
“Ia sal somoirango sabisirangni giproroaniko champengna lockdown-ko ra·gatanichi kangal cholgrirangde cha·na ringna dongpilgija neng·nikanirangko chagrongna nangtokenga aro ia me·chikmaba an·tangni dedrangna cha·anirangko on·pana gitasa me·su samjakrangko pale cha·paengachim. Uni gimin iandake district administration-ni ge·etanichi police-rangni daka kamko chinga raken jegalenga,” ine GSMC-ni co-chairman Balkarin Ch Marak parakataha.
Gipin biaprangoni ma·manti bosturangko salbaenggipa manderangko re·napbana on·e biaptango donge dokkan dake cha·enggiparangkode iandake champengskaengani gimin GSU-ni vice president Frenky N Marak-ba, district administration aro police-rangni kamko raken jegalataha.
Ia me·chikma COVID-ni niamrangko pe·enga ong·ode uko dai gamatnasa nangachim indiba uni pale sim·e cha·enggipa bosturangko pakrurue galaniara A·chik me·chikmako chonnikani gita ong·aha ineba GSMC aro GSU dolrang parakatenba, ia me·chikmana uni noksan ong·ani kri tangka paisarangko gamskachina gita West Garo Hills a·jani deputy commissioner-o dabiangaha.