TURA: West Garo Hills a·jani a·kawe jolrango gitan da·o South West Garo Hills a·jaoba gipin biaprangoni manderang niam gri napsruke songdong a·chatokengaha ine South West Garo Hills a·jani A·chik Holistic Awakening Movement (AHAM) dol parakataha.
Iani bidingo South West Garo Hills a·jani Deputy Commissioner Ch Ramakrishna aro Garo Hills Autonomous District Council (GHADC)-ni Deputy Chief Executive Membor Nikman Ch Marak-na badi ka·doangengon, gipin biaprangoni napsrukbaenggipa manderang, South West Garo Hills a·jani Katuli, Ichakuri, Takunbari, Kalaichar, Doguripara, Lukaichar, Bansali aro Tepolpara songrango niam gri songdong a·chatokenga ine AHAM South Western Zone-ni general secretary Wester G Sangma parakatenba, ia biaprango niam gri songdong a·chaenggipa manderangko ta·raken a·rikgalchina didiataha.
AHAM-ni parakatani gitade, ia biaprango niam gri napsruke songdong a·chaenggipa manderangara Meghalaya aro Assam a·dok damgnion niam gri pu·onenggipa manderangba ong·achim aro uandaken da·o South West Garo Hills a·jani mitam songrangode gipin jatrangan Tribal-rangna bate bang·batpilengahachim.
“Ia songrangona niam gri napsrukbae songdong a·chaengani gimin songni nokni Nokmarang aro village committee-rangsa chingna u·iataha. Uni gimin ia biaprango niam gri napsrukbae songdong a·chaenggiparangko sandie ta·raken a·rikgalatchina aro ia songni manderangna naljokaniko on·china chinga mol·molenga,” ine AHAM-ni dilgiparang parakataha.
