TURA: West Garo Hills a·jao aro mongsongbate Tura jillani dingtang dingtang biaprango dokkan dakenggiparangoniko niam gri tangka gile ra·enggipa manderangko West Garo Hills a·jani Superintendent of Police (SP) Vivekanand S Rathore mikrakataha.
Tura jillani dingtang dingtang biaprango aro mongsongbate bazar antirango dokkan dakenggiparangoniko aro me·su samjakrangko pale cha·enggipa manderangoniko badiaba badiaba manderang niam gri tangka gile ra·enga ine koborko man·soahani gimin West Garo Hills a·jani SP mikrakataniko on·angaha.
Iandake niam gri tangka paisa gile ra·anirang donggenchimode sepangbatgipa OC/IC-rangona ba 7005225721 nombor-ona ka·e una u·iatchina gitaba SP u·iataha.
Niam gri tangka gile ra·aniko nikgenchimode video-rangko ka·e police-rangna watatchina gitaba SP u·iataha.
“Iandakgipa obostarangko anga an·tangan am·sandigen aro dos dakgipa manderangna dongimin niamrango pangchake rakbatgipa sastirangko on·gen,” ine SP parakataha.
