TURA: Meghalaya Teachers Eligibility Test (MTET)-ko pass ka·gijagipa skigiparangko sorkari kam bon·atengahani a·sel, ru·uta bilsirangna contractual-o kamko ka·enggipa skigiparang da·o bilsirang re·angahani a·sel maming janggi tangani cholrang dongjaengahani gimin bilsi batgimin contractual teacher-rangna MTET-ko ong·atpiltaie cholrangko on·taichina gita skigiparang, a·dok sorkariko mol·molataha.
Iani bidingo South Garo Hills a·jani contractual teacher-rang, Siju-Rongara-ni MLA Rakkam A Sangma-na memorandum-ko on·angaha aro iani bidingo a·dokni Chief Minister baksa agangrikenba, skigiparangna cholko on·taichina gitaba mol·molataha.
Skigiparangni parakatani gitade, mitam skigiparangde bilsi 10 batpile contractual-o kam ka·paenggiparangba dongachim indiba da·o sorkari ia skigiparangni kamko bon·atengahani a·sel da·o bilsirang batahani gimin sorkarini gipin kamrangnaba galpana man·jaha aro nokdangtangtangko chalaianio bang·a neng·nikanirangko chagrongna nangtokengahachim.
“Skigiparangoni mitamde nokdangko chalaianio saksan ong·e bang·a neng·nikanirangko chagrongna nangtokengaha, uni gimin ia skigiparangna cholko on·taina gita dingtangmancha MTET porikkako ong·attaichina chinga mol·molenga,” ine skigiparang, Siju-Rongara-ni MLA-na seatgipa chittio parakataha.
